Chin State khualipi dang dang ah SAC ralhrang pawl nih mipi lungthin tei an kan duh caah le kan mah lei kap in dir hna seh ti an duh caah atu cu an policy an thleng cuamah cang i, September 12 ah Falam khualipi SAC he a pehtlaihmi buu dang dang pawl nih, eidingmi pawl hna cu man fawitein zinglei suimilam 7 thawk in zuar an thawk i, suimilam pahnih chungin an thil zuarmi vialte hi mipi nih an cawk dih, a cawh manh lo mi, cawk a duh ngaimi tampi an um ri tiah thei a si.
Mah hnuah September 14 ah Tedim ah 20% discount in dawr an onh than i, a cawk dingmi mipi an tam tak tak. Cun, mah hnuah Kanpalet lei ah zong mah bantuk in tuah hram an i thawk ve cang. Mah bantuk in SAC nih an tuahnak ruang bik cu mipi kha kan mah lei kap in dir hna seh law, cun vawleicung nih kan rian tuan ning hi thei seh law, vawleicung hmaiah thil tha kan tuah tiah langter ding in mah bantuk in an kalpi mi a si. Report nih a chim ning ahcun mah bantuk in ralhrang ralkap nih thil an tuah hnuah Chin State chungah mipi hna nih thil man fawitein an cawk khawh caah an nih nuam ngai tiah thei a si. Cre-The Tahan New
