Mandalay ramṭhen, Pyikyidagun peng Khrihfa ngaktah cawmnak inn cu SAC ralkap nih PDF he pehtlaihnak an ngei tiah an puh hna caah an umnak sianginn cu an kharpiak hna caah zaan riahnak hmun ngeilo in lampi ah harnak an tong tiah theih a si.
November 2, zaan suimilam 6:00 hrawng ah PDF he pehtlaihnak nan ngei tiah puh an ton caah inn khar piak an ton hi a si.
“Ngaktah sianginn ah cun SAC ralkap minung thazaang tamngai an ra i zaan ah an luhnawh hna hnu ah an umnak inn in an chuah hna, ngakchia hna cu an thil an thiar ter dih hna hnu ah an kalter hna, zei sualnak hmanh a ngeilo mi ngakchia hna cu khoika hmun ah khua an sak lai i an riah lai kan theilo” tiah tualchung mi pakhat nih a chim.
==Yangon ramṭhen, Thaketa peng no.29 siangniamrun ah November 2 ah siangakchia 49 nih ciazaam an i eisual tiah theih a si. Thaketa peng no.10/ chaklei sang ah ummi no.29 siangniamrun sianginn ah chuahcamtuak a phanmi hna nih an hlutmi cia-zan an ei hnu ah, cu cia-zan a eitu ngakchia paoh an lungmit, an luak an luak i ngakchia 17 cu sizung tiang an kalpi hna tiah tualchung mi hna nih an chim.
No.29, siangniamrun ah hlutmi chungin an ei thlu lo mi cu sangchung ummi ngakchia an pek ve hna caah, sangchung mi minung 3 zong sizung ah kan kuatchih hna tiah mi bawmchantu phu an motor khaltu nih a chim tiah theih a si.
==Rakhine ramkulh, Thandwe(သံတွဲ) peng le Taungkauk peng kar Thetkepin(သက်ကေပြင်) khua pawng Thadwe-Yangon motor lampi ah rallam a sialmi SAC ralkap cu nizan November 1 zinglei ah AA nih bomb an puahhnawh hna caah SAC ralkap 13 an thi, tiah theih a si.
SAC ralkap 30 hrawng cu ke in rallam an sial i, Taungkauk peng in an chuak i Thetkepin le Ywapakar(ရွာပကာ) khua karah bomb in kan puahhnawh hna caah ralkap 13 an thih hi a si, tiah theih a si. SAC ralkap bomb puahhnawh an ton ruangah pawngkam khuate um cheukhat cu an zam. SAC ralkap pawl cu khuate ah an lut i khuami cheukhat zong an tlaih hna i bia an hal hna, tiah min langhter a duh lomi pakhat nih a chim.
A luancia October 26- 31 tiang AA le SAC ralkap kar kahdohnak ah AA nih SAC ralkap 24 kan thah hna pinah 26 nak tlawm lo hlaimhma an pu, tiah nizan November 1 ah AA nih cathanh an chuah tiah theih a si.
==Nawlngeihnak latu Min Aung Hlaing le Soe Win an inn a umnak Yangon, Inya lam ah humhimnak a latu SAC ralkap check gate cu a luancia October 31 zan ah kah an ton caah cuka hmun kiangkap cu motor luhchuak khawh a ngah ti lo, tiah palik he naihniam in a ummi hna sinin theih a si.
“Kah an tonnak gate hi Min Aung Hlaing le Soe Win an inn hngahnak ca ah biapi in an hmanmi gate pakhat a si i nizan November 1 thawk in zan sml 8:00 thok in lam kham dih ding ah SAC nih nawl an chuah,” tiah Khit Thit Media nih an langhter.
Min Aung Hlaing le Soe Win an inn umnak Inya lam le Pyi lam thluan vialte cu SAC ralkap nih an congh dih ko nain October 31 zan ah motor in check gate hngak SAC ralkap a kaptu motor an tlaih khawh lo ruangah anmah ralkap le palik lila checkhlatnak an tuah hna, tiah theih a si.
