Zi Phia sakhan ah training a kaimi Pyu Saw Hti hna cu drone in an doh hna. Magway ramthen, Pauk peng, Zi phia khua ah SAC nih tuahmi ralkap training a kaimi Pyi Saw Hti hna cu November 26 zaan suimilam 5:00 am hrawng ah Myaing PDF Battalion 1 le phu fonh hna ni drone in an kah bomb an thlak hnawh hna.
Ziphia sakhan I training a kai mi hna hi minung 50 hrawng an si hna I training an tuah cuahmah lio ah drone in bomb an thlak hnawh hna hi a si, minung 5 an I hliam tiah Myaing PDF zong nih an thanh.
Cupinah SAC lei a hliam mi hna cu helicopter in an thiar hna zong hmuh khawh a si. CNBC
Relchap….Taze Peng Ah SAC Ralkap Nih Tualchung Mi Inn An Khangh Caah Inn 150 Hrawng A Ciam. Sagaing ramṭhen, Taze peng chaklei ah a ummi Htanpin Seih(ထန်းပင်ဆိပ်) khua ah SAC ralkap hna cu nizan November 27 chun ah rallam an sial i voithum tiang inn an khangh, tiah theih a si.
Htanpin Seih khua cu SAC ralkap nih atu le atu an pal tawnnak khua a si i a hlan zong ah voihnih tiang an rak khangh bal cang. Atu a voithumnak an khangh caah a khua ning in a ciam ti tluk a si ko, tiah tualchung mi hna nih an chim.
“A voithumnak an khanghmi ah hin inn tam tuk a ciam. Va phalh kan duh ko nain SAC ralkap le pyusawhti an um caah kan kal ngam lo. Pyusawhti hi tualchung mi lawngte an si i anmah nih SAC ralkap pawl cu lam an hmuhsak hna,” tiah tualchung mi pakhat nih a chim.
SAC ralkap nih Htanpin Seih khua cu a voithumnak an khangh caah inn 150 hrawng a ciam kho, tiah tualchung mi hna sinin theih a si. Ralhrial bawmchantu pakhat nih,” Htanpin Seih khuami hna cu ralhrial in a himnak hmun ah an i dor. An khua ah an kir ngam rih hna lo. Umnak hmun serisiam piak an hau lai,” tiah a chim. Cre-TCP
